Brodor o Fachynlleth yw David, ac astudiodd gerddoriaeth yng Ngholeg Prifysgol Cymru Aberystwyth a dysgodd grefft arweinydd gan y meistr Syr Adrian Boult. Enillodd raddau MA a PhD am ei waith ymchwil i gerddoriaeth gan gyfansoddwyr Prydeinig ac mae wedi cyhoeddi’n helaeth, gan gynnwys erthyglau yn ddiweddar i’r New Grove Dictionary of Music and Musicians a Proms y BBC.  Disgrifiwyd ef yn y cylchgrawn Opera fel “ein hawdurdod pennaf ar lawysgrifau Sullivan”, ac mae wedi ymwneud yn agos iawn â chynyrchiadau cwmnïau opera blaenllaw megis Cwmni Opera Cenedlaethol Cymru, Cwmni Cenedlaethol Lloegr, Cwmni Opera Newydd Sadler’s Wells, Cwmni D’Oyly Carte, ynghyd ag eraill yn America ac Awstralia. Mae wedi golygu cerddoriaeth Sullivan ac yr oedd yn ymgynghorydd i ffilm Mike Leigh, Topsy-Turvy, a enillodd Oscar.

 Cyhoeddodd Gwasg Prifysgol Rhydychen ei argraffiad o Ruddigore a dorrodd dir newydd ac a gafodd ganmoliaeth gan yr adolygwyr. Ar hyn o bryd y mae cwmni Opera North yn perfformio’r argraffiad hwn.  Mae gweithiau eraill a olygwyd ganddo i’r un wasg yn amrywio o’r Paukenmesse gan Haydn i Ail Symffoni Walton. Mae David wedi ennyn cryn ddiddordeb a chanmoliaeth yn genedlaethol am ei berfformiadau o gerddoriaeth gan gyfansoddwyr Prydeinig a esgeuluswyd – er enghraifft, bu’n arwain Cerddorfa’r National Festival mewn cyngerdd gyfan o gerddoriaeth gan German yng Ngŵyl Edward German a recordiodd opereta German, Tom Jones, gyda chast o unawdwyr rhyngwladol. Fe’i cyhoeddwyd gan Naxos a’i ddewis yn Recordiad y Flwyddyn gan dderbyn canmoliaeth aruthrol.

 Dychwelodd Dr Hulme i Aberystwyth i fod yn Gyfarwyddwr Cerdd cyntaf y Brifysgol yn 1992. Mae’n adnabyddus yn lleol fel arweinydd yr Undeb Corawl, Cymdeithas Gorawl Aberystwyth, a’r Philomusica.